المقادير:
1- كوب ونصف دقيق.(لو عايزينها بني شيلي معلقتين كبار دقيق وحطي معلقتين كبار كاكاو)
2- كوب سكر.
3- نصف كوب زبدة اوسمن او زيت.
4- 3 بيضات.
5- باكت فانيليا + ملعقة كبيرة بيكند بودر.
6- ربع كوب لبن او عصير برتقال
7- ربع كوب سفن اب(يمكن الغائه ويصبح اللبن نصف كوب)
*الطريقة:
- في الخلاط حطي البيض والسكر والسمن واللبن او عصير البرتقال واضربيهم لحد السكر ما يدوب .
- في بولة حطي كل المكونات الجافة(الدقيق-الفانيليا-البيكنج بودر) واخلطيهم كويس اعملي حفره في وسط الدقيق
صبي الخليط وضيفي السفن اب وقلبي بشوكة الى ان تتجانس المكونات ويختفي الدقيق ولو حسيتي ان الخليط سايب شوية زودي شوية دقيق ولو حسيتي انه ماسك شوية زودي شوية لبن او عصير.
- صبي الخليط في القالب ودخليه الفرن وهو حامي 10 دقايق على نار عالية وبعدين وطي النار وسيبيه 30-40 دقيقة لحد ما يستوي وسيبيها تبرد شوية وبعدين اقلبيها في طبق التقديم ورشي على وشها سكر بودره او جوز هند او شيكولاتة مجروشة او كاكاو
*طب و انا اعرف منين انه استوى اقولك هاتي سكينه واغرزيها في قلب الصينية للاخر لو طلعت نظيفة تبقى الكيكة استوت لو طلعت بالعجين تبقى لسه عايزه سوى.
*انا بقى ساعات اغير شوية حاجات يعني اعملها بالنسكافيه- اقطع جواها موز- اقطع شيكولاتة يعني حاجات كدا وانت كمان اعمليها وفنني فيها
وممكن تعمليها بالورد هاتي براعم الورد وحطيها في ماء لحد ماتطرى وضيفيها للخليط.
بالعافيـــــه